JOAN MORERA ARBONES

Vigo, 1984

España, (da serie Nuevos monumentos para un viejo país)

2021
Prego de selos oficiais manipulados manualmente con esencia de trementina e coitela, enmarcado
170 x 80 cm

España. Baixo este título preséntase unha folla de 80 selos borrados, con esencia de trementina, onde apareceu o retrato do rei Juan Carlos I de Borbón. Este traballo revisa a idea de monumento a través de representacións pertencentes ao noso imaxinario colectivo e cotián.

Esta obra, así como o proxecto do que forma parte (Nuevos monumentos para un viejo país), indaga sobre as formas de representación e codificación da memoria e da identidade, desde unha idea expandida do monumento. Explora, ao mesmo tempo, as emocións que este tipo de representacións, cun forte trasfondo político, poden suscitar. É unha obra que xoga cos mecanismos de representación simbólica do poder e do noso contexto presente.

Joan Morera Arbones (Vigo, 1984)
Artista e investigador.

Doutor en belas artes pola Universidade de Vigo, coa tese Construción simbólica del paisaje gallego: Transmisión generacional del paisaje, realizou unha estadía de investigación en Bos Aires (Arxentina) no Museo da Emigración Galega (MEGA) . Así mesmo, foi seleccionado para realizar unha residencia de produción artística en «La Pinguela», en Oberá (Arxentina). Tamén realizou varias residencias artísticas en diferentes institucións públicas e privadas como o Colegio de España en París ou a Fundación Bilbao Arte. Participou en multitude de certames artísticos, exposicións colectivas e proxectos autoxestionados dentro e fóra de Galicia. Traballou coa galería Ad Hoc de Vigo. Ten obra nas coleccións Fundación BilbaoArte Fundazioa, Fundación Galicia Europa, Deputación de A Coruña e Consellería Política Social – Xunta de Galicia.